Varios
Fondo pesar polo pasamento de Manuel Alonso, tamborileiro de Noitarega
A música tradicional está de loito, deixounos Manuel Alonso, tamborileiro de Noitarega e un dos grandes percusionistas tradicionais galegos e mellor persoa.
Dende a Asociación de Gaiteiras e Gaiteiros Galegos lamentamos profundamente esta perda, e queremos manifestar o noso máis fondo pesar a súa familia e amigos.
Sempre estarás presente na nosa memoria. Que a Terra che sexa leve. DEP
O funeral oficiarase o xoves ás 16:30h en Sárdoma.
Actividades de Nadal na Tradescola
Achegase o Nadal, e dende a Tradescola temos previstas varias actividades para estas datas.
O martes da vindeira semana, día 19 de decembro, teremos unha audición de Nadal na capela de Santa María de Lugo ás 19.00 h, na que contaremos con alumnado de Canto e pandeireta, de Pandeira, de Gaita e Percusión e tamen con alumnado de Baile, que nos achegarán unha escolma de pezas tradicionais destas datas!!
Continuaremos o xoves día 21 de decembro cos mais peques da Tradescola, que ofrecerán un mini concerto de Nadal ás súas familias e amigos.
E para rematar, o venres 22 de decembro, pola tarde darémoslle a Benvida ao Apalpador xunto a outras asociacións da cidade, cunha actuación da Tradescola que está prevista para as 19.00 h. no Mercado Municipal de Quiroga Ballesteros, e na que participará alumnado de Canto e Pandeireta, Acordeón e alumnado de Zanfona da Tradescola.
Esperámosvos a todas e a todos para iniciar estas festas da mellor maneira posible : coa nosa música e o noso baile tradicional!!!!
A Tradescola realizará a vindeira semana concertos didácticos para escolares de Outeiro de Rei
A Tradescola realizará o vindeiro mércores unha nova actividade de promoción e difusión da música e do baile tradicional na provincia. Concretamente, o día 20 de decembro achegarase ata Outeiro de Rei, concretamente ao CEIP Laverde Ruiz, para impartir unha nova xornada de música tradicional para escolares. Con estas xornadas, que contan coa axuda da área de Cultura da Deputación de Lugo, a Tradescola pretende achegar á comunidade escolar a nosa música e a nosa cultura tradicional, dun xeito ameno e didáctico a través dos concertos impartidos nos distintos centros.
Realizarase tres concertos didácticos neste centro, como parte do premio pola participación no X Certame de debuxo para escolares que se realizou o pasado curso, e no que foi gañadora Aroa Fernández Barreiro.
O concerto estará impartido polos mestres da Tradescola Lucía Eiros, Jose Manuel López, Miguel Anxo López e Roberto Rodríguez, e nel amosaránselles aos alumn@s distintos instrumentos, ritmos, e melodías protagonistas da música tradicional e popular galega.
Dende a Tradescola trabállase a reo para poder transmitir os coñecementos das nosas tradicións da mellor maneira posible ás novas xeracións, para que saiban conservalos, respectalos e poñelos en valor.
Estos concertos son moi importantes para a Tradescola, xa que estes posibles novos músicos e bailadores serán os que xoguen un papel básico no futuro das nosas tradicións, da nosa música, canto e baile e como non, tamén da nosa lingua.
Xornadas de baile tradicional da AGG en Cedeira
A AGG organiza o vindeiro domingo 3 de decembro, unha nova edición de xornadas de baile tradicional que terán lugar en Cedeira. Nelas contaremos con obradoiros guiados por Olga Kirk, Xisco Feijoó e Sergio Cobos.
Os obradoiros destas xornadas, subvencionadas pola Deputación de A Coruña e que contan coa colaboración do concello de Cedeira e da Asociación Cultural Buxainas, están pensadas tanto para os profesionais do mundo da danza, como para todos aqueles interesados no baile tradicional, para que poidan completar os seus coñecementos e participar de xeito activo na mellora e dinamización da nosa tradición.
PROGRAMA:
(3 DE DECEMBRO) - Cedeira
11.45 - Apertura
12.00 – Relatorio - Obradoiro I
“ O baile solto en Santa Comba” - Olga Kirk
13.30 – Remate sesión da mañá
16.00 - Relatorio – Obradoiro II
“Formas da música e danza nas jotas antigas do serán” – Xisco Feijoó
17.30 – Descanso
17.45 - Relatorio – Obradoiro III - Sergio Cobos
DATA: Domingo 3 de decembro
LUGAR: CEIP Nicolás del Río – Cedeira (A Coruña)
INSCRICIÓNS (*): Deberán facerse nos teléfonos 986 84 70 74 ou 982 22 99 66 ou enviando un correo electrónico a Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo , indicando nome, apelidos, un teléfono de contacto e mail.
* Os obradoiros son de balde e as prazas limitadas, tendo preferencia @s soci@s da AGG, que disporán ata o martes 28 de novembro para inscribirse, e partir desa data si quedan prazas dispoñibles, cubriranse coas solicitudes de inscrición de non soci@s, por orde de chegada.
A través de actividades como esta, pretendemos non só difundir a cultura tradicional, senón que ademais queremos fomentar este tipo de encontros, que consideramos imprescindibles, xa que se amosa a riqueza cultural dunha maneira aberta, chea de contidos e na que se pode participar de xeito activo, contribuíndo e potenciando deste xeito a divulgación da cultura e a súa conservación.
AS TRADICIÓNS DE OUTONO CHEGAN Á TRADESCOLA
O vindeiro xoves, terá lugar no Centrad, unha actividade que achegará as tradicións de outono a todas e todos os participantes. Esta actividade, que será para público familiar, contará cun obradoiro de fabricación de xoguetes sonoros, un obradoiro de xogos bailados e cantigas relacionados con estas datas, un magosto e xogos tradicionais da man de Xotramu, todo para darlle a benvida ao outono cunha nova actividade de difusión e promoción da nosa música, o noso canto e o noso baile tradicional e outras tradicións existentes na nosa cultura.
Esta actividade conta coa axuda da Área de Cultura do Concello de Lugo e a cesión das instalacións para realizala por parte do Centrad. Durante esta actividade farase entrega dos agasallos para os finalistas do X Certame de Debuxo dobre o baile e os instrumentos da música tradicional organizado pola Tradescola.
Esta é unha nova actividade que se suma ás levadas a cabo durante o curso, no que a maiores das aulas impartidas de zanfona, gaita, acordeón, baile tradicional, canto e pandeireta, percusión, requinta, e linguaxe musical ás que asisten mais de 300 alumn@s, están realizándose tamén distintas actividades como esta para darlle difusión á nosa cultura tradicional.
Máis artigos...
Páxina 2 de 528