Luar na Lubre afonda na lírica medieval no seu disco ‘Solsticio’
Venres, 10 Decembro 2010 09:09
O grupo ponlle música no álbum a composicións de Afonso X, o Sabio e de Martin Códax e ofrece tamén temas propios
O grupo Luar na Lubre presentou na Fnac da Coruña o seu novo disco Solsticio, un álbum no que a lírica medieval galego-portuguesa conta con gran peso. “Neste traballo recollemos 15 cancións e a metade delas son composicións dese rico patrimonio literario. Aquí, en Galicia, non se está a cultivar o suficiente mentres grupos doutros países como Alemaña ou Italia se están a fixar na nosa tradición medieval”, sinalou o músico Bieto Romero durante a presentación de Solsticio.
Luar na Lubre recupera así cantigas de Martin Códax ou de Afonso X, o Sabio como tamén varias composicións tradicionais para constituír unha pequena mostra desas composicións históricas. “A lírica medieval galego-portuguesa é inmensa. Non é fácil seleccionar. Tiñamos mil partituras para escoller e ao final quedámonos coas que saen no disco. Estas composicións son unha fonte inesgotable para o futuro e non só para nós, senón para todos”, explicou Bieito Romero.
Pese a recuperar estas composicións históricas, Luar na Lubre busca proporcionarlles as esencias do seu son. “Nós non somos un grupo de cámara, nós achegámoslles o noso estilo propio. Nalgunhas mantemos a instrumentación e os rexistros vocais da época medieval, pero noutras empregamos guitarras eléctricas”, adianta o voceiro do grupo galego.
Con este Solstiticio, Luar na Lubre pecha un ciclo conformado por dez discos dende a publicación do seu célebre Plenilunio, disco co Luar na Lubre. que acadou o éxito internacional. Entre ese disco e o último, a formación foi mudando paulatinamente o seu estilo. “Houbo unha evolución de moito percorrido. Partimos dese punto no que asinamos con Warner Music para Plenilunio. A partir de aí houbo un paso adiante en cada disco. Con cada novo disco, fixemos o mellor traballo indo sempre máis alá”, explicou Bieto Romero.
Os oito compoñentes de Luar na Lubre iniciarán en xaneiro unha nova xira de presentación por todo o estado. Esa xira inclúe un total de vinte citas e está previsto que o Teatro Rosalía acolla o 16 de decembro o concerto que o grupo ofrecerá na Coruña. Non obstante, Luar na Lubre pretende ir ao redor do mundo para presentar este novo disco. “Percorremos máis de 26 países dende que formamos o grupo. Sempre é unha honra ser embaixadores, pero quédanos un lugar que queremos visita: Australia. Sería un soño actuar tamén aló”, recoñeceu en nome do grupo Bieto Romero.
A presentación do disco Solsticio incluíu a interpretación en directo de varios temas na Fnac da Coruña. A xornada de onte serviu de aperitivo para a xira de actuacións que o grupo fará para presentarlle ao público o seu novo traballo.
