Mañá celebraremos os maios cos nenos e nenas da Tradescola e darémoslle a benvida á primavera cunha nova actividade de difusión e promoción da nosa música, o noso canto e o noso baile tradicional.

Varios / 18.05.22

Mañá xoves, 19 de maio, celebraremos os maios cos nenos e nenas da  Tradescola  e darémoslle a benvida á primavera cunha nova actividade de difusión e promoción da nosa música, o noso canto e o noso baile tradicional.

A partir das 16.30 horas terá lugar a elaboración dun maio figurado a cargo das/os nenas /os que se recubrirá con fentos, fiuncho, herbas e frores silvestres (No Centrad - Rúa Chantada S/N - LUGO). Posteriormente, alumnas/os dos grupos infantiles e mestres da Tradescola  ofrecerán distintas actuacións nas que se poderá gozar de numeroso repertorio tradicional cantado e bailado ao redor dos maios.

O programa da celebración será o seguinte:

Xoves 19 de maio

De 16.30 a 17.00 horas: Elaboración de maios figurados.

E posteriormente haberá actuacións arredor do maio a cargo dos grupos infantiles da Tradescola.

Esta é unha nova actividade que se suma ás levadas a cabo durante o curso, no que a maiores das aulas impartidas de zanfona, gaita, acordeón, baile tradicional, canto e pandeireta, percusión, requinta, e linguaxe musical, están realizándose tamén certames e concertos didácticos de música Tradicional para escolares de distintas comarcas da provincia.

A TRADESCOLA ORGANIZA UN NOVO CONCERTO DIDÁCTICO DE MÚSICA TRADICIONAL PARA ESCOLARES DE FOZ

Varios / 16.05.22

A Tradescola achegarase o vindeiro mércores 18 de maio ata o concello de Foz, concretamente ao CEIP O Cantel, para impartir unha nova xornada de música tradicional para escolares. Con estas xornadas, que contan coa axuda da área de Cultura da Deputación de Lugo, a Tradescola pretende achegar á comunidade escolar a nosa música e a nosa cultura tradicional, dun xeito ameno e didáctico a través dos concertos impartidos nos distintos centros.

Realizarase un concerto didáctico, que estará impartido polos mestres da Tradescola, Roberto Rodríguez, Miguel Anxo López. Alberto Núñez e Bruno Villamor: No concerto amosaránselle aos alumn@s distintos instrumentos, ritmos, e melodías protagonistas da música tradicional e popular galega.

Dende a Tradescola trabállase a reo para poder transmitir os coñecementos das nosas tradicións da mellor maneira posible ás novas xeracións, para que saiban conservalos, respectalos e poñelos en valor.

Estos concertos son moi importantes para a Tradescola, xa que estes posibles novos músicos e bailadores serán os que xoguen un papel básico no futuro das nosas tradicións, da nosa música, canto e baile e como non, tamén da nosa lingua.

“Sons de Maio para Florencio Delgado Gurriarán” - Tradescola

Varios / 13.05.22

A vindeira semana iniciarase o ciclo “Sons de Maio para Florencio Delgado Gurriarán” con actuacións diante da Deputación de Lugo das aulas de música e baile tradicional da Tradescola. 

Aproveitando a celebración das Letras Galegas adicadas a Florencio Delgado Gurriarán, a Tradescola ofrecerá distintas audicións na praza de San Marcos (Lugo) nos vindeiros días. Esta nova actividade de difusión e promoción da nosa música, o noso canto e o noso baile tradicional conta coa colaboración da área de Cultura da Deputación de Lugo (Vicepresidencia).

Con estos concertos, a Tradescola quere sumarse ós distintos actos en homenaxe a Florencio Delgado no día das nosas letras, e nos mesmos, poderemos gozar de numeroso repertorio tradicional, interpretado pol@s alumn@s e mestres da Tradescola onde non faltarán gaitas, zanfonas, percusións, acordeóns, cantareir@s e por suposto bailadores e bailadoras. Esperámosvos!!

Grabacións históricas do cuarteto "Os Mariñáns" de Guísamo no vindeiro Recuncho da Palleta

Varios / 13.05.22

Este domingo, na sección o "Recuncho da Palleta" do "Lume na Palleira", conducido por Emilio Españadero, contaremos con con Ramón Dopico recuperando grabacións históricas do cuarteto "Os Mariñáns" de Guísamo.

Non te perdas, esta nova emisión do Recuncho da Palleta dentro do programa Lume na Palleira, o domingo as 17:00 horas.

IX CERTAME DE DEBUXO PARA ESCOLARES SOBRE OS INSTRUMENTOS DA MÚSICA TRADICIONAL GALEGA ORGANIZADO POLA TRADESCOLA

Varios / 11.05.22

O certame de debuxo “Os Instrumentos da Música Tradicional Galega – A Zanfona” é unha iniciativa posta en marcha pola Tradescola (escola de música e baile tradicional xestionada pola Asociación de Gaiteir@s Galeg@s na cidade de Lugo) en colaboración coa Área de Cultura (Vicepresidencia) da Deputación de Lugo e que acada este ano a súa novena edición. Nesta edición o instrumento elexido é a Zanfona, e os debuxos versarán sobre este instrumento.

A finalidade desta actividade, dirixida ás nenas e nenos de primeiro, segundo e terceiro curso de primaria dos centros de ensino da provincia de Lugo, é potenciar e difundir entre os máis pequenos a música e a cultura tradicional galega, axudar a que coñezan os nosos instrumentos, a nosa historia e costumes dun xeito natural dende os primeiros anos, fomentando actitudes de respecto e valoración da mesma.

É necesario que se produza un proceso de transmisión da cultura, o que constitúe unha garantía da conservación das nosas tradicións e, en definitiva, do noso patrimonio cultural.

A Tradescola constitúe un proxecto educativo xestionado pola Asociación de Gaiteir@s Galeg@s que busca formación para todas e todos aqueles que queiran achegarse á música e ao baile tradicional galego. A maiores, organiza actividades complementarias vencelladas coa difusión da cultura tradicional, como é o caso deste IX Certame de debuxo sobre os Instrumentos da Música Tradicional Galega, que neste caso estará adocado á zanfona, co que ademais de fomentar o coñecemento da nosa cultura musical, axúdase a potenciar as destrezas manuais e a imaxinación dos rapaces.

Os debuxos e os dorsos dos debuxos, deberanse enviar (escaneados ou fotografiados) por correo electrónico á Tradescola ( Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo )ata o 27 de maio de 2022.

O xurado do certame estará composto por membros do profesorado da Tradescola, que seleccionarán un total de 10 debuxos finalistas que serán premiados cun lote de material didáctico. Dos 10 debuxos finalistas, seleccionarase un gañador@ que recibirá un premio consistente na matricula de balde nunha materia na Tradescola no curso 2022/2023. O centro educativo ao que pertenza @ gañador@, terá tamén un agasallo a maiores, consistente nun concerto didáctico de música tradicional a cargo da Tradescola no curso 2022/2023.

Se o teu centro de ensino quere participar pode poñerse en contacto coa Tradescola por correo electrónico ou chamando ao 982229966 . Esperamos os vosos debuxos!!!!

No vindeiro Recuncho da Palleta presentaremos o encontro "Tradición en Camiño"

Varios / 29.04.22

Este domingo, na sección o "Recuncho da Palleta" do "Lume na Palleira", conducido por Emilio Españadero, contaremos con Xaime Estévez presentándonos o encontro "Tradición en Camiño" que terá lugar en Mos o vindeiro 8 de maio.

Non te perdas, esta nova emisión do Recuncho da Palleta dentro do programa Lume na Palleira, o domingo as 17:00 horas.

IX xornadas de baile tradicional organizadas pola AGG en Lugo

Varios / 27.04.22

A AGG organiza o domingo 8 de maio, unha nova edición de xornadas de baile tradicional. Nelas contaremos con obradoiros prácticos impartidos por Pedro Brañas, Carme Campo, Chus Caramés e Luis Prego.

Os obradoiros destas xornadas, patrocinadas pola Xunta e coa colaboración do CENTRAD, están pensadas tanto para os profesionais do mundo da danza, como para todos aqueles interesados no baile tradicional, para que poidan completar os seus coñecementos e participar de xeito activo na mellora e dinamización da nosa tradición.

PROGRAMA:

10.15 - Apertura

10.30 - Obradoiro I: “O baile en Silvela” -  Pedro Brañas

12.00 – Descanso

12.30 - Obradoiro II: “Tornando ao bailar do Porriño” . Carme Campo e Chus Caramés.

14.00 – Remate sesión da mañá

17.00 - Obradoiro III: “O baile no Val do Dubra” -  Luís Prego

DATA: Domingo 8 de maio

LUGAR: CENTRAD (Rúa Chantada, s/n. Lugo)

INSCRICIÓNS (*): Deberán facerse nos teléfonos 986 84 70 74 ou 982 22 99 66 ou enviando un correo electrónico a Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo indicando nome, apelidos, un teléfono de contacto e mail.

* Os obradoiros son de balde e as prazas limitadas, tendo preferencia @s soci@s da AGG, que disporán ata o domingo 1 para inscribirse, e a partir desa data se quedan prazas dispoñibles, cubriranse coas solicitudes de inscrición de non soci@s, por orde de chegada.

A celebración das xornadas levarase a cabo cumprindo todas a medidas de seguridade necesarias por mor da COVID-19.

A través de actividades como esta, pretendemos non só difundir a cultura tradicional, senón que ademais queremos fomentar este tipo de encontros, que consideramos imprescindibles, xa que se amosa a riqueza cultural dunha maneira aberta, chea de contidos e na que se pode participar de xeito activo, contribuíndo e potenciando deste xeito a divulgación da cultura e a súa conservación.

Anímate a participar!!!

No vindeiro Recuncho da Palleta adiantarémonos á celebración do Día Internacional da Danza.

Varios / 22.04.22

Este domingo, na sección o "Recuncho da Palleta" do "Lume na Palleira", conducido por Emilio Españadero, contaremos con Gustavo Couto, co que nos adiantaremos á celebración do Día Internacional da Danza.

Non te perdas, esta nova emisión do Recuncho da Palleta dentro do programa Lume na Palleira, o domingo as 17:00 horas.

VIII Memorial Henrique Otero: O ciclo do ano nas obras do Gaiteiro do Fragoso

Varios / 20.04.22

Este sábado a partir das 19.30 horas terá lugar en Vigo a VIII edición do MEMORIAL HENRIQUE OTERO no que como cada ano soará unha escolla das obras do mestre, que nesta edición está adicada ao ciclo do ano nas obras do Gaiteiro do Fragoso. Neste concerto-homenaxe organizado pola AGG e o CSMVigo, coa colaboración da Deputación de Pontevedra, estarán representados, aparte da cidade olívica, o Val Miñor, O Morrazo, Mos e Mondariz e estréanse na súa participación a Banda de Gaitas da Etrad, A Banda Cans de Palleiro de Bembrive e a Banda Sons do Abrente de Mos… que únense a outras agrupacións ou institucións que repiten como o Conservatorio Superior de música, Os Carunchos, A Seneira, Sons do Río, Raigames, Breogán de Moaña ou Penaveira. Entrada de balde ata completar aforo.

PROGRAMA

ALUMNADO DO CSMVigo (Patricia Rodríguez, Manuel Riveira e Uxío Dayán)

• Fandango dos Maios (2011)

PENAVEIRA

• Brétemas Xacobeas (1991)

SONS DO ABRENTE DE MOS

• Danza das Penlas (1969)
• Fiadeira-Danza da Roca (1997)

O SON DO RÍO DE MONDARIZ

• Na Romería de San Brais (2011)

JUAN PENA

• Ana (intro.)(1982)
• Sementeira(1988)

A SENEIRA DE BAIONA

• Muiñeira de San Xoan(1985)
• Amieiros do Lagares(1980)

BREOGÁN DE MOAÑA

• Xota de San Xoan(1988)
• Lumieira(1981)

CANS DE PALLEIRO

• Son de Primaveira(2003)
• Sementeira(1988)

OS CARUNCHOS

• Ao Carón do Ano Vello(1997)
• Orballo(1970)

BANDA DE GAITAS DA ETRAD

• Muiñeira de Santa Cristina(1978)
• Rumba de Santa Lucía (2001)

RAIGAMES

• A Farándula (1974)
• Tempos de Nadal (1989)

FINAL COLECTIVO

• Ventosiño (1970)

O VIII Memorial Henrique Otero "O Gaiteiro Do Fragoso" no vindeiro Recuncho da Palleta

Varios / 13.04.22

Este domingo, na sección o "Recuncho da Palleta" do "Lume na Palleira", conducido por Emilio Españadero, contaremos con Xaime Estévez que nos presentará a VIII edición do Memorial Henrique Otero "O Gaiteiro Do Fragoso", que despois de dous anos nos que tivo que realizarse de xeito virtual, volve ao formato presencial. 

O VIII Memorial Henrique Otero "O Gaiteiro Do Fragoso" terá lugar, como é habitual, no Auditorio Martin Códax do Conservatorio Superior de Música de Vigo, o sábado 23 de abril.

Non te perdas, esta nova emisión do Recuncho da Palleta dentro do programa Lume na Palleira, o domingo as 17:00 horas.