IV Noite de Fiadeiro

19.04.10

Un ano máis chega a Noite de Fiadeiro polo derradeiro Sábado de Abril, organizada polo Colectivo Rebulir e o Patrocinio do Concello de Ramirás e a Deputación de Ourense. Neste 2010 cúmprese a IV edición da festa, que nacía no 2007 coa intención de recuperar os Antigos Fiadeiros da Comarca, aquelas reunións festivas de mozas e mozas que se xuntaban para bailar, tocar e cantar.

Deste xeito, o vindeiro 24 de Abril a cita está no pobo de Vilavidal no Concello de Ramirás. Durante toda a Xornada haberá actividades dirixidas a todos os públicos, para comezar as 21:00 h co prato forte, a festa propiamente dita, coa participación de preto de 20 colectivos chegados de diferentes puntos da xeografía galega que porán a música. Previamente, as 20:00 h farase unha chamada aos veciños para participar da festa, cun pasarrúas de Xigantes e Cabezudos, animación de rúa, foguetes e a Charanga Tradicional Os Estoupapozas tocando polas rúas.

Queremos recordar unha vez máis que non se trata dun festival ou mostra de música tradicional ou folclórica, senón que é unha festa que implica ao visitante na súa dinámica. Deste xeito, procúrase que se poda bailar, tocar, cantar, ou simplemente disfrutar do ambiente da noite.

Para descargar o programa prema aquí.

Exposición de fotografías de Anxo Valcárcel en Lugo

19.04.10

Cincuenta e oito desas fotografías amósanse na exposición ‘Carlos Valcárcel. Fotografías 1969-2001’ que este xoves se inaugurou na Sala Isaac Pardo da Facultade de Veterinaria de Lugo, coa presenza do vicerreitor de Coordinación do Campus de Lugo, Carlos Herrero; a vicerreitora adxunta de Infraestruturas e Servizos da USC, Marta Miranda; a vicedecana de Estudantes e Relacións Exteriores de Veterinaria, Patricia Fernández de Trocóniz; o alcalde de Lugo, José López Orozco; o vicepresidente primeiro da Deputación Provincial, Antonio Veiga; o xerente territorial da Fundación Caixa Galicia, Sinesio Pérez; e o propio Carlos Valcárcel.
Estas fotografías, feitas con cámara analóxica e en branco e negro, teñen un destacado valor etnolóxico, xa que permiten facer un percorrido pola historia de Galicia nos últimos corenta anos a través das súas paisaxes e as súas xentes. Entre as obras expostas figuran algunhas da feira de Monterroso dos anos 60, das festas de San Froilán ou da situación do poboado xitano do Carqueixo na década dos 70, singulares imaxes dalgunhas das máis coñecidas praias luguesas e mesmo unha fotografía tomada ao escritor Uxío Novoneyra acendendo un cigarro na porta da súa casa.

Carlos Valcárcel explicou que decidiu ceder estas fotografías aos fondos da USC porque considera que “pola súa labor social e cultural é o lugar máis axeitado” para conservar e divulgar unha parte importante da súa obra que supón unha “pequena historia da sociedade galega”.

A mostra pódese visitar na Facultade de Veterinaria ata o vindeiro 14 de maio, en horario de 9:00 a 21:00 horas de luns a venres.

http://www.apeneira.com

Pasarúas por Pontevedra

16.04.10

Co gallo do macro concerto organizado pola plataforma Queremos Galego, que terá lugar mañá sábado 17 no recinto feiral de Pontevedra, os grupos Os Lerenses e Os Faíscas de Solobeira ofrecerán un pasarrúas que comezará ás 18h na plaza da Ferrería e recorrerá o Casco Vello para rematar no lugar no que se celebrará o concerto.

A ASPG Presenta Canto de Permanencia

15.04.10

A Asociación Socio-Pedagóxica Galega presenta mañá día 15 na Coruña e o día 20 en Santiago Canto de Permanencia.
Este é o título sobre o que se recollen, en formato audiovisual, tres traballos, autónomos mais complementares, sobre a persoa e a obra de Uxío Novoneyra.

1.- Canto de permanencia, documental creativo e obra experimental, que dá título ao DVD, é unha interpretación, en linguaxe cinematográfica, dunha escolma de textos da obra de Novoneyra. Sobre este guión literario sobreponse un guión de ficción para termos unha obra que combina textos con imaxes reais rodadas en espazos simbólicos da obra de Novoneyra e, xunto con estas, outras recreadas en estudios de gravación ou en espazos interiores e con actores, resultando un produto susceptíbel de ser visionado de maneira autónoma e independente de calquera contexto e de calquera coñecemento previo da obra de Novoneyra. Cabe salientar que, coa selección de textos, o guión procura construír unha liña temporal que podería seguir o devir das catro estacións.

2.- O segundo audiovisual, A Certeza de Sermos, recolle un recitado de textos de Novoneyra por el proprio. Son textos até agora non divulgados procedentes dos fondos documentais da AS-PG, agás un cedido polo CIFP Anxel Casal da Coruña. Van unidos argumentalmente por textos de discursos de Novoneyra coa voz en off de Fernando Morán e teñen en común presentan o seu carácter marcadamente social.

3.- Finalmente, e como Extras, o DVD recolle un recitado de versos dedicados a Novoneyra por Manuel María, Méndez Ferrín, Mª Xosé Queizán, Bernardino Graña e García Bodaño xunto con imaxes inéditas da gravación de Canto de permanencia.

Este traballo vaise vender, a partir da semana próxima en que teremos as copias, ao prezo de 10 euros. Se estás interesado/ en adquirir un exemplar con anterioridade e pedindoo directamente á AS-PG podes recibilo no teu enderezo ao prezo de SEIS euros. Para iso debes ingresar os 6 euros na seguinte conta de caixa Galicia:
2091-0000-35-3040150083.
Concepto: Canto de permanencia.

Máis info: http://www.as-pg.com/

Alex Regueiro, obradoiro de traxe tradicional galego

13.04.10

Presentamos o traballo de Alex Regueiro, creador de As Galas de Alén, un obradoiro de traxes tradicionais galegos cualificado pola Xunta de Galicia. A súa laboura é a de recuperar o vestimenta popular galega. Dirixido por Alex Regueiro, artesán cualificado polo mesmo organismo, leva quince anos aportando un traballo moi importante para a recuperación e conservación desta parte do patrimonio galego.

O seu traballo está especializado no que deu en chamar alta costura tradicional, pezas mimamadas e exclusivas como antano, onde cada gaiteiro se distinga pola súa mestría tocando e pola elegancia coa que vestía. Na actualiade, Alex Regueiro traballa e colabora con varios museos e organismos públicos e privados para recuperación do noso ben querido traxe tradicional.

Tamén é admistrador do grupo de AMIGOS DO TRAXE TRADICIONAL GALEGO en Facebook que conta con case 3000 compoñentes. Visita a súa páxina.

Ruada en Cabaleiros

09.04.10

Dende a Asociación Cultural Brisas do Quenllo queremos convidarvos á Ruada que organizamos en Cabaleiros o sábado 17 de Abril, na Sala Calviño a partir das 22:00.

Castelao, a derradeira lección do mestre

07.04.10

O Museo Provincial de Lugo innaugura unha exposición adicada a Castelao, baixo o título de "A derradeira leccióndo mestre...". O axto que abrirá o evento terá lugar o día 14 de Abril ás 20:00 horas.


Con exta exposición preténdese evidenciar a esencia da súa arte, da súa obra literaria, do seu pensamento e da súa vida dedicada a esta terra. Esta exposición, non só suporá unha homenaxe a unha vida e un traballo continuado de entrega inigualáble a Galiza, senón que tamén será un convite para que siga estando vixente, como exemplo, para as galegas e galegos de hoxe.

V Foliada de Cerqueda

23.03.10

A Asociación Cultural Raigañas ten o pracer de invitarvos á V Foliada que se celebrará en Cerqueda o sábado 27 de marzo a partir das 10.30 da noite.

Ó igual co ano pasado a Foliada terá lugar nas Escolas das Pozacas debaixo dunha gran carpa. Haberá comida e bebida para quen desexe cear alí e a festa estará amenizada polo grupo de música tradicional “Tombalobos Orquestra” que nos deleiteará coa súa música para que pasemos unha noite entretida e divertida. Ademáis subrián ó escenario todos aqueles grupos que queiran tocar por libre. E a partir das 3.30 da mañá actuará o artista Manolo Delfín alias “Pixitas de Muxía” que fai versions moi deivertidas de cancións actuais.

Para nós será un pracer contar con vós ese día, ¡NON FALTEDES, NON VOS ARREPENTIREDES!

Asociación Cultural Raigañas
Cerqueda-Malpica.

A 18ª edición das "Noites de Tasca"

22.03.10

A 18ª edición das "Noites de Tasca" celebrarase en Mesía (A Coruña) o vindeiro venres 26 de marzo no Bar Quique (fronte a igrexa).

Actuará Manuel Viqueira Vieites, o gaiteiro de Vilaverde (Ordes) e os membros da Escola de Música Tradicional de Mesía.

E despois, Foliada toda a noite con participación aberta a todos.

XORNADAS ADICADAS AO TRAXE TRADICIONAL NA TRADESCOLA

18.03.10

A Tradescola, escola de música tradicional xestionada pola Asociación de Gaiteiros Galegos, ven de organizar unha exposición de traxes tradicionais galegos que se poderá visitar na sala de exposicións do Complexo Residencial Xuvenil LUG II de Lugo a vindeira semana.
Nesta exposición, que está formada por un total de 20 traxes da colección de Alberto Golpe, poderemos ver a diversidade do traxe tradicional galego e a súa riqueza etnográfica.

En concreto, na exposición poderanse observar catro traxes antigos femeninos de cerimonia de Betanzos, Meira, Cedeira e A Ulla, un traxe antigo montañes de Vilalba, tres reproduccions de traxes de cerimonia de muller de Bergantiños, Muros e Amaia, oito reproduccions de traxes montañeses de muller de Portomarin, Muras, Carballedo, Monterroso, Mesia, Abadin e Sarria, e catro traxes de home montañeses e de cerimonia, todos eles traxes completos, con calzado, complementos e adornos propios do vestir doutro tempo.

A maiores da exposición, o venres día 26 de marzo ás 18.30 h. terá lugar unha charla coloquio onde Alberto Golpe explicará aos asistentes a orixe e evolución histórica de cada unha das prendas e dos seus complementos, os seus materiais en función dos labores típicos, dos costumes, e da tradición ou condicións socioeconómicas da cada zona.

Estas xornadas están enmarcadas dentro dun conxunto de actividades realizadas pola Tradescola, co propósito de acercar a cultura tradicional galega a toda a poboación. A AGG mostra así a súa inquedanza por manter a riqueza da vestimenta tradicional e conservar así esta parte da nosa cultura.

Ésta exposición permanecerá aberta dende o día 22 ata o día 28 de Marzo do 2010 en horario de tarde no Complexo Residencial Xuvenil Lug II, na Rúa Pintor Corredoira nº 4 de Lugo. A inauguración terá lugar o vindeiro martes 23 de Marzo ás 20.00 horas.