A MOSTRA ‘A GAITA NA MÚSICA TRADICIONAL GALEGA’ INICIA A SÚA ITINERANCIA EN VIASCÓN

10.05.18

Esta mañá o deputado de Cultura e Lingua, Xosé Leal, o presidente e vicepresidente da Asociación de Gaiteiros Galegos, Xoán Manuel Tubío e Oli Xiráldez, e a técnico de cultura do concello de Cerdedo- Cotobade, Mónica González, participaron no acto de apertura da mostra ‘A gaita na música tradicional galega’, que inicia a súa itinerancia pola provincia no concello de Cerdedo-Cotobade. A exposición poderá visitarse na Casa da Gaita, na parroquia de Viascón, ata o vindeiro 27 de maio. O deputado provincial asegurou que “quixemos iniciar o percorrido desta mostra neste lugar por ser un espazo emblemático para a gaita e para a música tradicional na nosa provincia, como é a Casa da Gaita e Viascón como berce do gran mestre gaiteiro Ricardo Portela”. Leal insistiu en que “esperamos que con esta mostra se visibilice máis a actividade que aquí se realice e que este museo sexa máis coñecido tanto entre as persoas interesadas na gaita e na música tradicional como entre o público en xeral”.

para ler a nova ao completo preme no título

Romaría de San Alberte e Festa da Fala (Guitiriz)

09.05.18

O vindeiro domingo día 20 de maio terá lugar a Romaría de San Alberte e Festa da Fala na Capela de san Alberte (parroquia de San Breixo de Parga - Guitiriz) organizada por Xermolos.

Etá prevista unha camiñata dende Guitiriz pola ruta da Auga ás 10 h. ou dende Parga ás 12 h. Entre outras moitas actividades ás 14.30 h. contarán cunha sesión vermú a cargo de Airiños da Freba e Sons da Aldea, que lembrará ó gaiteiro de sambreixo "O Belonio".

Ás 17 horas presentación do libro sobre xaquín de Roca e ´partir das 18.00 horas peque de festa de novo con Airiños da Freba e coa participación das Bruxainas da Anpa do CEIP Lagostelle

Concerto do Coro galego Cantares do Brión no auditorio de Goián (Tomiño)

09.05.18

Este sábado, 12 de maio, ás 22:00 horas, no Auditorio de Goián (concello de Tomiño), concerto das Letras galegas, a cargo do Coro galego Cantares do Brión.

Un variado repertorio de canto, baile e teatro. Composicións musicais propìas, sobre letras de poetas do noso tempo e outras do cancioneiro popular tradicional e dos coros históricos.

Foliada de primavera no Castro (Begonte) organizada por Castiñeiro Milenario

09.05.18

Castiñeiro Milenario organiza unha xornada de cultura e música tradicional, na que as protagonistas serán as nenas e nenos que se acheguen ata a parroquia do Castro (Begonte), onde, guiadas por Branca Villares, van aprender a facer un maio e botar unhas cantigas ao seu arredor. Xa pola noite a música será a protagonistra nunha nova edición da Foliada de Primavera.

Programa:

Comezaremos pola tarde cunha merenda para a cativada, chocolate e biscoito para coller forzas e ir apañar flores e fentos e xestas para facer un maio ben bonito e grande. Dirixidos polas sabias indicacións de Branca Villares faremos un maio, probaremos a facer algún “maio vivo” e cantaremos unhas pezas ao redor do maio, nenos, nenas e maiores todas xuntas para dar a benvida á primavera.

Despois haberá uns petiscos para empezar unha nova edición da Foliada de Primavera. A partir das nove, comezará a festa o grupo residente, Foliadeir@s do Castro, nesta ocasión moi ben acompañado pola Asociación A Legua Dereita desde O Corgo, As Cernellas de Santa María de Bóveda e para rematar, Troupelear desde Baralla. Ao remate, foliada aberta ata que os corpos aguanten.

 Toda a información na  páxina

https://castinheiromilenario.wordpress.com/2018/05/04/actos-foliada-de-primavera-e-maios/

Comunicado da Asociación de Gaiteir@s Galeg@s a respecto da supresión do espazo “Diario Cultural"

09.05.18

A CRTVG ven de decidir a supresión (na vindeira tempada) da emisión do emblemático programa Diario Cultural no seu actual formato.

Este espazo, conducido por Ana Romaní; é un dos programas diarios de información cultural máis veteranos da radiodifusión galega, emitíndose dende o ano 1990. Neste espazo cultural de información, análise e creación conflúen as novas expresións e distintos formatos artísticos en diálogo coa historia cultural.
A supresión deste espazo público destinado á cultura galega en todos os seus campos, atenta contra os propios criterios fundacionais da CRTVG e vén acompañada doutros cambios na programación tales como a eliminación das desconexións locais dos informativos, que consideramos que afectarán moi negativamente aos servizos que a CRTVG, como organismo público que é, debería prestar.
Dende a Asociación de Gaiteir@s Galeg@s, queremos expresar o noso total desacordo coa decisión da supresión do Diario Cultural e queremos transmitirlles todo o noso apoio á equipa do programa.

Aí ven o maio!!! Actuacións da Tradescola na Praza Maior de Lugo

07.05.18

O vindeiro Martes día 15, na Tradescola celebraremos os Maios con actividades e concertos na rúa (na Praza Maior de Lugo (ao carón do templete)).

O programa será o seguinte:

Aí ven o Maio…!

Martes día 15

17.00 horas: elaboración dun maio figurado a cargo das/os nenas /os da Tradescola que se recubrirá con fentos, fiuncho, herbas e frores silvestres.

18.00 horas: Actuacións a cargo de grupos infantiles e de grupos de canto e pandeireta e baile tradicional da Tradescola.

Esperámoste!!!!!

A Tradición dos Maios no Recuncho da Palleta

04.05.18

No vindeiro Recuncho Da Palleta,  acompañaranos Gustavo Couto, que será o encargado de achegarnos á Tradición dos Maios.

Non te perdas, esta nova emisión do Recuncho da Palleta dentro do programa Lume na Palleira, o domingo as 17:00 horas.

E lembrade que nas madrugadas de luns a martes (de 01:00h a 02:00h), na Radio Galega, tedes unha cita coas "Escolmas Musicais" de Lume Na Palleira.

Exposición temporal na Casa da Gaita sobre "A Gaita na Música Tradicional Galega"

04.05.18

A Deputación de Pontevedra achega á Casa da Gaita a exposición intinerante sobre "A Gaita na Música Tradicional Galega".

O vindeiro xoves 10 de maio, ás 12.30 horas, terá lugar a inauguración desta exposición na que disfrutaremos dun concerto do cuarteto tradicional Faiscas de Solobeira.  

A exposición permanecerá  na Casa da Gaita (Viascón, Cerdedo - Cotobade) do 10 ao 27 de Maio e poderase visitar en horario de luns a venres de 10 a 14 horas, sábados de 10 a 14 e de 16 a 20 horas e domingos de 10 a 14 horas.

Colaboran Carlos Collazo de la Fuente, Museo de Pontevedra e a AGG.

Fuxan os Vento musica a María Victoria Moreno

03.05.18

Co gallo do Día das Letras Galegas, o emblemático grupo de folk Fuxan os Ventos musica o poema “Lúa de Prata” da homenaxeada este ano 2018: María Victoria Moreno.

Fuxan os Ventos mergúllase na lírica da autora e enchóupaa da súa esencia, conseguindo que cada palabra vibre como unha nota máis desta melodía.

Esta canción pretende lembrar á escritora que tan fonda pegada deixou nas nosas letras, especialmente na literatura infantil e xuvenil.

Fuxan os Ventos, seguindo o ronsel doutros anos, volve render homenaxe ás nosas letras cunha harmonía de sons, na que voces, vento, corda e percusión van da man sublimando as verbas de María Victoria Moreno.

Colaboran neste tema Roi Adrio (percusións), Simón García (contrabaixo), Adrián Valdés (fagot) e Miguel Díaz (clarinete).

Podes ver o vídeo no Youtube: https://www.youtube.com/watch?v=t8caJVBVGQY

Pesar polo pasamento de Otilio da Burela

28.04.18

Hoxe temos que lamentar o falecemento de Otilio Fernández García (Otilio da Burela).

Otilio naceu na Burela, parroquia de Carballido, A Fonsagrada. Foi conocido como” Otilio da Burela” ou “Otilio de Fernandín”; tocou a gaita dende neno observando a Constante de Valiña e a Alberto Rodríguez veciños de A Rebordela. De mozo acudia a todas as polavilas, festas ou reunións da contorna onde se reclamaba a presenza dun gaiteiro. Deixou de tocar a gaita ao casar, e no ano 94, cando acudiu a una xuntanza de gaiteiros na Fonsagrada, decidiu volver a retomala.

Otilio participou na celebración do 25 aniversario da AGG, e recentemente, na 23 edición do Xantar Gaiteiro celebrado na Fonsagrada, a AGG rendeulle unha merecida homenaxe xunto ao resto de tocadores da comarca da Fonsagrada.

O funeral de enterro será mañá domingo ás 17.00 horas na Iglesia parroquial de Carballido (A Fonsagrada).

D.E.P.

Fotografía realizada Florencio Rodríguez López.