Varios
XI Xornadas arredor da música tradicional
13.09.23
A AGG organiza o vindeiro 23 de setembro, en colaboración coa Consellería de Cultura da Xunta de Galicia, a que será a undécima edición das Xornadas arredor da música tradicional e que se celebrarán na Casa da Gaita (Viascón).
Esta cita anual, que pon de relevo a importancia dos traballos de investigación, está destinada non só as persoas que traballan no eido da música tradicional, senon tamén a todas aquelas que queiran saber máis tanto das nosas tradicións, como das de outros lugares, xa que ao igual que nas pasadas edicións, amosaranse outras culturas tradicionais, creando un punto de encontro no que coñecer, afondar e transmitir as tradicións e no que se amosa a riqueza cultural dunha maneira aberta ao poder participar de xeito activo nas diversas ponencias, contribuindo e potenciando deste xeito a divulgación da música tradicional e a súa conservación.
PROGRAMA:
10.15 - Apertura
10.30 - Relatorio I : “A música da Farsa do Carril. Unha danza de espadas histórica”. Cristian Silva
11.20 Quenda de preguntas
11.30 - Relatorio II : “Arredor do patrimonio cultural inmaterial colectivo. Viaxe a unha declaración BIC”. Beatriz Busto
12.20 Quenda de preguntas
12.30 - Descanso
12.45 - Presentacións de publicacións
13.30 - Xantar
16.30 - Relatorio III : “Os Zés Pereiras: uma cultura musical do Entre Douro e Minho”. Napoleão Ribeiro
17.20 Quenda de preguntas
17.30 - Presentación do documental “Labrando músicas”.
17.55 Coloquio con Xaneco Tubío e Alejandro Gándara. Modera Susana Rois
18.30 - Descanso
19.00 - Relatorio IV : “O folión de Mormentelos. O Entroido na aldea de Mormentelos e os elementos que o compoñen”. Álvaro Rúa
19.50 Quenda de preguntas
A participación nas mesmas será de balde, previa reserva e ata completar aforo, tendo preferencia @s soci@s da AGG, que disporán ata o domingo día 17 de setembro para inscribirse, e a partir desa data as prazas dispoñibles cubriranse por orde de inscrición.
LUGAR: Casa da Gaita – Viascón (Cerdedo-Cotobade) e en liña
DATA: Sábado 23 de setembro
INSCRICIÓNS: Poderán faderse nos teléfonos 986.847.074 – 982.229.966 ou enviando un correo electrónico a Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo indicando nome, apelidos, un teléfono de contacto e mail.
Adeús a musicóloga Dorothé Schubarth, autora do Cancioneiro Popular Galego
08.09.23
O mundo a música tradicional está de loito, onte falecía en Basilea, Dorothé Schubarth, un dos nomes imprescindibles cando falamos do noso patrimonio sonoro. Autora, xunto con Antón Santamarina do Cancioneiro Popular Galego, obra básica no estudo do noso folclore que aínda hoxe supón o referente para coñecer parte da nosa tradición músical.
Dorothé Shubarth chegaba a Galicia en 1978 durante unhas vacacións, para coñecer o noso folclore, alguén lle falara da súa riqueza, e a que ía ser unha breve estadía converteuse en anos de pescudas, entrevistas con informantes por toda a xeografía galega e centos de gravacións, que deron, despois dun intenso traballo de recollida, análise, clasificación e estudo dese material, a publicación en 1984 do Cancioneiro Popular Galego, en sete volumes, nunha edición publicada pola Fundación Barrié, considerado o máis amplo repertorio da musica popular de tradición oral galega.
Os musicólogos que até aquel momento fixeran estudos sobre a música popular ficaran na superficie do traballo, realizando compilacións de cantigas. Pola contra, Schubarth levou a cabo unha análise en profundidade das melodías, achegando unha proposta crítica de clasificación e propoñendo teorías sobre as orixes dos diferentes tipos. Ademais, foi a primeira que recoñeceu a importancia das informantes, sendo a primeira que recolleu os seus nomes. Foron cinco anos de traballo por aldeas, montes e corredoiras, que non remataron coa publicación dos materiais, senón que crearon un vínculo permanente da musicóloga con Galicia.
No ano 2014 doou os seus rexistros sonoros, 248 CD (copias dixitalizadas das gravacións orixinais) coas correspondentes transcricións a cargo de Antón Santamarina, ao Museo do Pobo Galego, onde foron incorporados ao seu Arquivo do Patrimonio Oral da Identidade (APOI) e ao Consello da Cultura Galega que permite o seu acceso no Arquivo Sonoro de Galicia.
Dende a Asociación de Gaiteiras Galegas lamentamos profundamente a perda dunha persoa tan importante e que tanto fixo pola música da nosa tradición oral.
LV Concurso de Gaitas do País - Ponteareas 2023
01.09.23
O Concello de Ponteareas, no seu afán por promover e difundir a música tradicional galega, convoca para o vindeiro sábado 23 de setembro de 2023 a LV EDICIÓN DO CONCURSO DE GAITAS DO PAÍS, consolidándose coma a festa musical da súa especialidade máis antiga de Galiza e colocando a Ponteareas como referente no panorama da música tradicional galega.
Poderán participar no concurso ata un máximo de vinte grupos de gaitas que toquen con instrumentos tradicionais galegos, sen modificación de ningún tipo. Pódense presentar tanto persoas físicas como xurídicas.
Os grupos participantes interpretarán dúas pezas de libre elección, de raíz melódica galega.
O prazo de admisión de solicitudes remata o día 15 de setembro de 2023. Os grupos interesados podedes ver as bases no seguinte enlace: http://ponteareas.gal/xiralda/uploads/2023/07/BASES-ASINADAS-CONCURSO-DE-GAITAS-2023.pdf
RELACIÓN DE PREMIOS:
- 1º premio 2.000,00 €
- 2º premio 1.500,00 €
- 3º premio 1.000,00 €
- 4º premio 600,00 €
A fundación pública Artesanía de Galicia, obsequiará aos gañadores do primeiro premio cunha gaita tradicional galega e un tamboril.
O Concello de Ponteareas outorgará unha gratificación de 400,00 euros aos grupos en concepto de participación, agás o 1º premio, o 2º premio, o 3º premio e o 4º premio, conforme a das Bases de Execución do Orzamento Municipal.
Toda a información, bases completas e anexos para as inscricións no seguinte enlace: http://ponteareas.gal/servizos/cultura/bases-cultura/
Fondo pesar polo pasamento de "SITO", tamborileiro de "Duos Pontes" e de "Marmurios de Leucoiña"
08.08.23
IN MEMORIAM
JOSE LUIS ARGIBAY GARCÍA “SITO” ( D.E.P.)
Onte día 7 de Agosto, falecía en Pontevedra, José Luis Argibay García, aos 61 anos de idade. Tamborilero coñecido por “Sito”, e que fixo toda a súa traxectoria musical -de 42 anos – nos grupos “Duos Pontes” e “Marmurios de Leucoiña”, dos que é compoñente fundador.
Na súa dilatada traxectoria musical, que compaxinou con diferentes actividades profesionais, fixo sempre gala dun gran corazón, sinxelo trato, gran simpatía e retranca, que lle acompañaron ata os últimos momentos.
Representou a Galicia en diversos escenarios nacionais e internacionais, intervindo en moitos programas de televisión. Colaborou na divulgación do “toque pechado”; e na recuperación de moitas festas tradicionais, que hoxe gozan de gran prestixio. Participou como percusionista na gravación do disco homenaxe a Ricardo Portela , no disco “Festas en Poio” e en moitas gravacións didácticas e de base musical para grupos de baile (a moitos os acompañou nas súas actuacións).
Deixa un grato recordo, e unha gran familia da que gozaba e á que facía gozar cando as súas obrigacións profesionais permitíanllo. Á súa muller Rosa, ás súas fillas Rosa María e Jessica, ás súas netas, irmáns e demais familia, acompañámoslles no sentimento.
O funeral celebrarase hoxe martes, ás 16:00 horas, na Igrexa de Santiaguiño do barrio do Burgo (Pontevedra).
Dende a AGG compartimos a dor e lamentamos fondamente o pasamento de Sito. DEP.
XXIV edición do Memorial Ricardo Portela.
03.07.23
Xa tes plan para os días 14, 15 e 16 de xullo?? Pois apunta a data porque promete!! esa fin de semana tes unha cita coa XXIV edición do Memorial #RicardoPortela.
Nas inmediacións da praza da Ferrería de Pontevedra, contaremos durante os tres días coa #mostra de instrumentos de #musicatradicional, con #pasarrúas que encherán a #BoaVila co característico estilo interpretativo do Mestre Portela, a homenaxe a Concha de Luneda e tamén poderás gozar cos concertos de #Lagharteiras, #XistradeCoruxo e #OsFolieiros!!! Todo esto, nunha fin de semana que coma cada ano acolle o Memorial Ricardo Portela que organizamos a Asociación de Gaiteirxs Galegxs - AGG en colaboración co Concello de Pontevedra. Esperámoste!!!
#MemorialRicardoPortela #ConcelloDePontevedra #Pontevedra #instrumentostradicionais #gaiteirosgalegos #agg
A TRADESCOLA ORGANIZA DOUS NOVOS CONCERTOS DIDÁCTICOS DE MÚSICA TRADICIONAL PARA ESCOLARES DE LUGO.
06.06.23
A Tradescola, escola de música ebaile tradicional galego que xestiona a Asociación de Gaiteir@s Galeg@s na cidade de Lugo, realizará mañá unha nova actividade de promoción e difusión da música e do baile tradicional. Concretamente, achegarase ata os CEIP As Gándaras e CEIP A Ponte de Lugo, para impartir dous concertos didácticos de música tradicional para escolares. Con estas xornadas, que contan coa axuda da área de Cultura da Deputación de Lugo, a Tradescola pretende achegar á comunidade escolar a nosa música e a nosa cultura tradicional, dun xeito ameno e didáctico a través dos concertos impartidos nos distintos centros.
Realizaranse dous concertos didácticos, que estarán impartidos polos mestres da Tradescola, Bruno Villamor, Germán Díaz, Roberto Rodríguez, Míguel Anxo López, Alberte Núñez e Jose Manuel López no que lles amosarán aos alumn@s distintos instrumentos, ritmos, e melodías protagonistas da música tradicional e popular galega.
Dende a Tradescola trabállase a reo para poder transmitir os coñecementos das nosas tradicións da mellor maneira posible ás novas xeracións, para que saiban conservalos, respectalos e poñelos en valor.
“Sons de Maio para Francisco Fernández del Riego” ciclo de actuacións diante da Deputación de Lugo das aulas de música e baile tradicional da Tradescola.
16.05.23
A vindeira semana iniciarase o ciclo “Sons de Maio para Francisco Fernández del Riego” con actuacións diante da Deputación de Lugo das aulas de música e baile tradicional da Tradescola.
Aproveitando a celebración das Letras Galegas adicadas a Francisco Fernández del Riego, a Tradescola ofrecerá distintas audicións na praza de San Marcos (Lugo) nos vindeiros días. Esta nova actividade de difusión e promoción da nosa música, o noso canto e o noso baile tradicional conta coa colaboración da área de Cultura da Deputación de Lugo (Vicepresidencia).
Con estos concertos, a Tradescola quere sumarse ós distintos actos en homenaxe a Francisco Fernández del Riego no día das nosas letras, e nos mesmos, poderemos gozar de numeroso repertorio tradicional, interpretado por alumn@s e mestres da Tradescola onde non faltarán gaitas, zanfonas, percusións, acordeóns, cantareir@s e por suposto bailadores e bailadoras. Esperámosvos!!
Concerto didáctico da Tradescola en Antas de Ulla
16.05.23
A Tradescola realizará o vindeiro venres unha nova actividade de promoción e difusión da música e do baile tradicional na provincia. Concretamente, o día 19 de maio achegarase ata Antas de Ulla, concretamente ao CEIP Plurilingüe de Antas de Ulla, para impartir unha nova xornada de música tradicional para escolares. Con estas xornadas, que contan coa axuda da área de Cultura da Deputación de Lugo, a Tradescola pretende achegar á comunidade escolar a nosa música e a nosa cultura tradicional, dun xeito ameno e didáctico a través dos concertos impartidos nos distintos centros.
Realizarase un concerto didáctico, que estará impartido polos mestres da Tradescola Lucía Eiros, Branca Villares e Alberte Núñez, no que lles amosarán aos alumn@s distintos instrumentos, ritmos, e melodías protagonistas da música tradicional e popular galega.
Dende a Tradescola trabállase a reo para poder transmitir os coñecementos das nosas tradicións da mellor maneira posible ás novas xeracións, para que saiban conservalos, respectalos e poñelos en valor.
Estos concertos son moi importantes para a Tradescola, xa que estes posibles novos músicos e bailadores serán os que xoguen un papel básico no futuro das nosas tradicións, da nosa música, canto e baile e como non, tamén da nosa lingua.
Hoxe é un día de moita tristura para o mundo da música tradicional; no colectivo da AGG estamos de loito por ter que despedir a Alejo Pacín Jul
15.05.23
Hoxe é un día de moita tristura para o mundo da música tradicional; no colectivo da AGG estamos de loito por ter que despedir a un dos nosos membros, Alejo Pacín Jul, gran gaiteiro, violinista e unha maravillosa persoa moi querida por todas e todos os que o coñeciamos.
Unha grande perda para o mundo da música tradicional pois a pesar da súa xuventude era un músico de grandísima calidade profesional e humana.
Dende a Asociación de Gaiteiras e Gaiteiros Galegos lamentamos profundamente esta perda, e queremos manifestar o noso máis fondo pesar a súa familia e amigos.
Sempre estarás presente na nosa memoria. Que a Terra che sexa leve. DEP
A Tradescola celebrará os maios cos seus alumnos na Praza Maior de Lugo!
28.04.23
O vindeiro martes 2 de maio, celebraremos os maios cos nenos e nenas da Tradescola e darémoslle a benvida á primavera cunha nova actividade de difusión e promoción da nosa música, o noso canto e o noso baile tradicional. 
Páxina 2 de 264
