XORNADA DE MÚSICA TRADICIONAL EN MONFORTE
Luns, 20 Abril 2009 16:53
A Tradescola, escola de música tradicional xestionada pola Asociación de Gaiteiros Galegos, no seu afán de incrementar a presenza da música tradicional galega na sociedade actual, dedicou unha xornada didáctica á percusión tradicional, zanfona e cantos de cego na vila de Monforte de Lemos. Esta xornada tivo lugar na tarde do domingo 19 de abril, no salón de actos da casa da cultura.
Esta actividade estivo guiada polos mestres da Tradescola Luis Correa “O Caruncho” e Xose Lois Romero Cajigal. O numeroso público asistente puido gustar dun concerto didáctico no que Luis “O Caruncho” amosou os secretos da zanfona, cantos de cego, romances... e Xosé Lois ensinou as distintas percusións utilizadas na música tradicional. Posteriormente, os mestres estiveron a disposición dos asistentes para responder a calquera dúbida ou inquedanza sobre os distintos instrumentos.
