Asociacion de Gaiteiros Galegos

Gaiteiros galegos
Inicio / Xunta directiva

Xunta directiva

A Xunta Directiva actual da Asociación de Gaiteiros Galegos, elexida por unanimidade dos presentes na Asambla Xeral Ordinaria que tivo lugar o pasado domingo 12 de abril de 2015, está formada por:

PRESIDENTE - Xoan Manuel Tubío Fernández

É un coñecido artesán de percusión galega e zanfona. É socio da Asociación de Gaiteiros Galegos dende a súa legalización no ano 1989 e membro da súa directiva dende o ano 1991, actuando de secretario dende esa data ata o 2015, ano no que se presenta como Presidente e sendo o impulsor da realización da mostra de música tradicional do domingo das mozas, nas festas do San Froilán, e da Mostra de instrumentos musicais de Pardiñas. Actualmente é percusionista do Grupo Os Minhotos.

VICEPRESIDENTE - Xesús Olimpio Xiráldez Río

Defínese como un “artesán de gaitas e frautas galegas”. Excompoñente do grupo “Chouteira”, na actualidade forma parte dos grupos “Tinta Femia” e "Carapaus" nos que toca as requintas e gaitas que el mesmo crea no seu obradoiro de Santiago de Compostela.

SECRETARIA - Erea Estévez Campos

No ano 1981 entra na Escola de gaitas da Deputación da Coruña onde estivo tres anos. Ao mesmo tempo que  entrou no grupo Aturuxo a bailar, onde comezou bailando no primeiro ano e seguiu como gaiteira nos cinco seguintes. No ano 1987 entrou en Cántigas da Terra como gaiteira. E é no ano 1992 cando entra na Banda de Gaitas Frouma, na que ainda permanece.

Comeza a aprender zanfona no 2000, sendo no 2003 cando pasa a actuar co grupo de zanfonas de Cántigas da Terra. Dende o 2004 ate o 2010 forma un quinteto de gaitas, Troulando. E no 2007 entra tamén a colaborar no grupo Tombalobos onde estivo ata 2009 e no que sigue colaborando de cando en vez.

Abalan a súa tarefa como mestra os casi 20 anos dando clase de Gaita en Cántigas da Terra e os anos que tamén deu clases en Monterroso e Carral.

TESOUREIRO - José Francisco Gil Dopazo

Membro do cuarteto de música tradicional “Picuíña” onde, xunto co resto dos compoñentes, adica nas súas actuacións tódolos seus esforzos a difundir o espírito que tiñan os cuartetos de antano, e a manter este tipo de formación viva. Colabora con diversas agrupacións ademais de atopar tempo para organizar as contas da Asociación.

VOGAIS

PABLO CARPINTERO ARIAS

Pablo Carpintero Arias é doutor en Ciencias pola Universidade de Santiago de Compostela e posúe o Diploma de Estudos Avanzados en Historia da Música. Entre 2006 e 2010 traballou no proxecto Ronsel da Universidade de Vigo para a recuperación do Patrimonio Cultural Inmaterial de Galicia e desde 2010 é consultor da UNESCO, sendo unha das persoas que evalúa a inclusión das candidaturas nas listas de Patrimonio Cultural Inmaterial da Humanidade.
É coautor das publicacións Catálogo de Músicos da Limia e Os Sons da Limia e ten editados varios capítulos de libros dedicados ao Patrimonio Cultural Inmaterial, así como numerosos artigos en revistas especilizadas, sendo a súa publicación máis destacada, Os instrumentos musicais na tradición Galega, que en 2009 recibíu o premio Antón Losada Diéguez 2009 na modalidade de investigación e ensaio.

Pablo Carpintero é gaiteiro desde hai máis de 35 anos sendo, ademais, constructor de gaitas, requintas e percusión tradicional galega. Ten realizado traballo de campo sobre a gaita de fol a música tradicional en xeral por todo Galicia, Asturias, Zamora, Bierzo e en todo Portugal.

É membro da comisión permanente do Arquivo Sonoro do Consello da Cultura Galega e dirixe dous grupos de recuperación de tradicions musicais galegas: A Requinta de Xián e Ars Antiqua. Ten editados once traballos discográficos e colabora semanalmente nos programas Luar e Lume na Palleira da RTVG, realizando seccións dedicadas á nosa música de tradición.  

GUSTAVO COUTO RODRÍGUEZ

Nace en Compostela no 1983. Ingresa no OCT Ultreia no ano 1996 como membro do grupo de baile, sección que dirixe dende o 2009. A partir do 2003 é mestre de baile tradicional, e dende ese ano dirixiu e dirixe diferentes grupos e escolas. Formou parte entre os anos 2007-2010 do Proxecto Ronsel para a recuperación e difusión do Patrimonio Cultural Inmaterial Galego. É coautor dun Libro-DVD de autoaprendizaxe do baile tradicional chamado Bailabén, editado por Edicións do Cumio. Con anterioridade participou na grabación do CD-DVD Pelo Gato 24 promovido pola Asociación de Gaiteiros Galegos, no que se ocupou da dirección artística do DVD que estaba adicado a xogos tradicionais.É bailador e percusionista de diferentes grupos de música tradicional como por exemplo o OCT Ultreia, Os Campantes da Baña, Carapaus e Armadanzas de Laraño.

XAIME ESTÉVEZ VILA

(Mos 1964) Xaime Estévez exerceu a docencia da gaita no Conservatorio Superior de Música de Vigo entre 1983 e 1988, substituíndo con dezaoito anos o que foi primeiro mestre de gaita galega dun Conservatorio, Henrique Otero. Tamén foi profesor no Conservatorio Mayeusis  e na universidade popular de Vigo ata o ano 2000.  É autor, entre outros, dos libros “ A Gaita no Eido da música” (1987) e do primeiro método infantil de iniciación á gaita "Son do Fol"(2012). Doutorouse  cunha tese sobre a música galega gravada e a súa aplicación didáctica (UNED 2006).  Actualmente exerce como profesor de música en secundaria na cidade olívica, forma parte do grupo "Os Terribles de Donas" e dirixe ó grupo infantil de gaitas "Os Novos Galiños de Belesar" e o Coro Galego do Círculo Cultural Abrente de Mos.

DANIEL FERNÁNDEZ LÓPEZ

(Lugo 1994) Estuda 1º curso de Grao Superior na especialidade de Instrumentos da Música Tradicional e Popular no Conservatorio Superior de Vigo e 1º curso de Grao en Filoloxía pola UNED. Alumno do mestre Bruno Villamor, pasa pola man de recoñecidos gaiteiros como Pepe Vaamonde, Daniel Bellón, Pablo Devigo, Pablo Carpintero, Alberto Coya ou Pedro Lamas en diversos cursos.

Membro da Banda de Gaitas de Cántigas e Frores desde o 2007 e mestre nas escolas de gaita desta agrupación (desde o 2010) e de Xistra (Pedrafita do Cebreiro, 2012). Foi un dos gaiteiros seleccionados para actuar con Carlos Núñez na Gala de Fin de Ano da TVG (ano 2012) e na presentación do seu traballo Discover, en Vigo (27-12-2012).

Na súa aínda curta traxectoria concursou como gaiteiro solista e en formacións de dúo (Dairea) e de cuarteto (Os Picurruchos) acadando diversos premios en todas estas formacións. Destacan o 1º premio xunto á percusionista Nerea Fouz López, formando o dúo Dairea, no XXV Concurso de Música Tradicional Xacarandaina na especialidade de gaiteiros solistas, gañando así o concurso nesta modalidade, e o primeiro accésit como gaiteiro solista no XXI Concurso Internacional de Composición e Gaita Galega “Constantino Bellón".

PILAR GONÇALVES BARRERAS

Cofundadora de “Os Carunchos”, grupo nacido no ano 1994, e do que forma parte ata o ano 2011 como percusionista, gaiteira, requinteira e cantora, cos que grava 4 discos: “Ala, que vai”, “Sen tempo non era”, “Montealegre” e “En galego”. En todos estes anos ten compartido escenario con outros importantes grupos do panorama musical galego.

Comeza a súa andaina como música tradicional con 14 anos dentro do Colectivo Paseniño de Vigo, e aparte da súa formación autodidacta, ten asistido a cursos con Xosé Manuel Fernández (Muxicas), Fernando Costas (Noitarega), Pedro Pascual (Marful), Xosé Liz (Riobó) ou Kepa Junkera, entre outros.

Completa os seus estudos musicais no Conservatorio Mayeusis de Vigo, no Conservatorio Folque de Lalín e na e-Trad de Vigo. É diplomada en Educación Musical pola Facultade de CC. da Educación de Pontevedra e na actualidade imparte Música nos niveis de Educación Infantil e Primaria no CEIP Seara (Moaña). Ten impartido aulas de expresión musical, percusión e baile, e recentemente incorporouse á Agrupación Breogán de Moaña, onde é mestra de pandeireta e canto. Participou nos coros en discos dirixidos ó público infantil, como “Animais encantadores” (Susa Herrera) ou “Pan de Millo” (Migallas). É compoñente do Colectivo Zeca Afonso, de Pardal na Rúa e do grupo Fiandola, co que vén de gravar o disco “Volta e media”. Neste último ano incorporouse á sección de canto da Orquestra Folk Sondeseu.

ALBERTE GRANJA BARGADOS

Farmacéutico comunitario en Donramiro (Lalín). Técnico Universitario en Ortopedia, botánico marina, especialista en cultivo de Undaria Pinnatífida, fundador do "grupo micolóxico do Deza" e con formación en hipnose e tratamento da dor. Foi gaiteiro de "Froitos do deza", membro colaborador do Conservatorio Folque de Lalín e actualmente componente da Tasca blues band,  e de A banda do Antón.

PEDRO MAGARIÑOS LORES

(O Grove, 1964). De mediados dos 70 a os 80 cursa estudos “non regrados” de guitarra e sobre todo de gaita galega (co mestre Secundino Abal González). Mantén contacto naqueles anos con Os Campaneiros, grupo do que sempre se sentíu fervente admirador.

Afinais dos 70 forma o grupo de gaiteiros “Os Mecos de Ogrobe” que terá moita actividade na decada dos 80. Desde o 1990 ate o 2009 imparte clases de gaita e percusión galegas nunha escola pública e forma a Banda de gaitas do Colexio público Rosalía de Castro de O Grove. Asi mesmo asiste a clases de clarinete cos mestres Xosé Antonio Soutelo e Alfonso Malvido. No 2009 refunda o cuarteto “Os Mecos de Ogrobe” coa intención de defender e promover a música popular de Galiza en particular o tesouro do facer de “Os Campaneiros”, o exemplo senlleiro de tocar a gaita das Rias Baixas.

VITOR OTERO VÁZQUEZ

JUAN PENA COSTAS

(Moaña, 1975) Empresario vitivinícola de profesión, aínda que moi vinculado dende cativo á música tradicional. Músico e compositor, está considerado como un alumno especial de Henrique Otero Covelo, o Gaiteiro do Fragoso. Socio fundador, Presidente e Mestre de Gaita da Agrupación Cultural Moañesa de Música e Danza.

ALBERTO PIRES LAGE

(Pontevedra, 1980) Comezou a ter contacto coa música tradicional no ano 1991, na Asociación Cultural Veira do Río de Pontesampaio, primeiro como percusionista e máis adiante como gaiteiro. Actualmente forma parte dos grupos De Viraçon de Vilagarcía e Poalleira de Arcade. Así mesmo colabora como músico coa Asociación Cultural Malveiras, de Carril, coa Asociación Cultural San Pedro, de Cea, coa Asociación Cultural Veira do Río, de Pontesampaio, e co grupo de baile galego Miúdos, de Arcade.

Tamén é artesán de gaitas galegas, iniciándose de xeito autodidacta na súa construcción no ano 2005.

BENITO QUEIMALIÑOS GARCÍA

Benito Emilio Queimaliños García, ten 32 anos, e leva ligado a música tradicional dende os 12 anos tocando en distintas agrupacións Tradicionais e Folk. Traballar a  madeira gustoulle dende neno, e cursou un FP de Ebanisteria ó que se leva dedicando dende os 18 anos. Dende o 2010 adicase expresamente a fabricación de instrumentos tradicionais no seu pequeno obradoiro en Redondela.

XOSÉ TUNHAS MONTERO

Nado en Ames en 1975, formouse como percusionista na Banda de Gaitas Os Castros de Ames. Foi membro fundador do grupo Folc Roi Xordo, e tamén percusionista do grupo de música e baile tradicional Brincadeira dende o ano 2001. Integrante da Orquestra Os Modernos, toca a batería con Caxade, e é artesán dende o ano 2004, de formación autodidacta.