Asociacion de Gaiteiros Galegos

Gaiteiros galegos

TRADESCOLA

Complexo Residencial Xuvenil Lug II

Rúa Pintor Corredoira, 4

27002 Lugo

Teléfono: 982 229 966

e-mail: tradescola@gaiteirosgalegos.com

Web: http://www.gaiteirosgalegos.com/tradescola/

A Tradescola, situada na cidade de Lugo, é un centro de formación especializado, cunha proposta educativa destinada a que o alumnado adquira unha formación integral na música e no baile tradicional.  A maiores das aulas impartidas no centro, coa intención de complementar a formación do alumnado, e no seu afán de incrementar a presenza da música e do baile tradicional galego na sociedade actual, impártense cursiños monográficos, concertos didácticos e realízanse outras actividades relacionadas coa difusión da cultura tradicional como conferencias, exposicións... O obxectivo é ofrecer formación a todas as persoas interesadas na música tradicional e poder colaborar con asociacións de toda a provincia, a través da realización de outras actividades relacionadas co ensino da música e baile tradicionais. A actividade da escola, aínda que centrada en Lugo, trasládase así, a través de diversas accións formativas, ás distintas comarcas da provincia.

A TRADESCOLA conta no seu equipo docente con 9 dos mellores mestres no eido da música tradicional para impartir as aulas de: gaita, requinta, zanfona, acordeón, baile tradicional, canto e pandeireta, técnica vocal, percusión, linguaxe musical e etnografía e investigación. Os mestres e mestras implicados neste proxecto educativo son: Bruno Villamor, Pedro David Lamas, Luis Correa “ O Caruncho”, Xerardo Quintela, Xabier Iglesias, Xela Conde, Begoña Lorenzo, Xose Lois Romero Cajigal e Mª Carmen Saborido. Todos eles son recoñecidos profesionais e contan cun dilatado currículo, como músicos e como docentes, no eido da música tradicional galega.